I pianna Ramah

Hmanah chuan hnaptawlh pur chungin vaivut leh chirhdiak karah thing hmanga suih motor lem hmangin kan inawmtlei thin. Kan hnap chu kan ban hmangin kan biangah kan tuaiphei a, kan biang a thleng  tep thin. Kan ban te chu, a hun laia tatoo kan hriatchhun ve, hnap kan hrutnain a tial nasa thei hle. Kan tan khawvel dang a awm lova, kan awmna khua atanga hmuhtheih chu kan khawvel a ni mai. Nilengin vaivut nen kan tal a, chhunah kan kut chu a fai nge a bal pawh ngaihtuah loin chawthing tlang lian tawk kan han keih hmawk hmawk zel mai a nia,,,.Nun a hahdam a, rukruk, inpawngsual, tualthah leh lek phei chu kan hre ngai lo hrim hrim. Wards Lake, Taj Mahal, Golf Link-te leh hmun dang dang te tlawhin nuam kan ti thin, mahse kan neih phak loh leh ‘KAN TA’, ‘KAN RAM’ kan tihtheihna chin ngeia nuam hi a lo nuam ber mai. Chuvang chuan alawm, a nuam leh hreawm ka hmachhawn vena tur atana ka hmuhtheih khawvel hmasa ber Samthang chu nuam ka lo tih tak em em nachhan chu.

                    Hun hian hlutna chi hrang hrang min siam a, hmana pasaltha leh tuna pasaltha kan tehna chu a inpersan chho a, Zawlbuk nun kha hlu ti em em chungin kan kalpel a, ral thah leh sa kahhlum chuan ropuina a keng tel tawh lova, khuangchawi leh thangchhuah hlutna hun a liam tawh a, heng hlutna inthlakte hian kan chetdan a nghawng a, kan duh leh tumte pawh a rawn tidanglam ta zel a. Hmanni lawka chawthing tlanga inhnawhpuar thinte chuan upat lam an pan zel a, chumi te chawthing  chu ‘Rum Pum’ leh ‘chhangthawp’-in a thlak a, nun  chu duhthu vang pawh ni lovin a inher danglam zel a, a  danglam zel bawk ang.

                    Kum zabi-21-na a khawvel huntawng mek ‘Computer Age’ nihna tifamkim turin kawng pakhat hmang chiaha tlawhpawlh theih  Zawlkhawpui naupang kum 6-mi inawmtleina chu computer a ni mek zel. Chumi belchhah turin Zawlkhawpui  chuan engage emawni a tawn tlang fo a, a tawn tlang zel dawn. Khawihthluk age, aw hmeltha age, sim card lei leh hralh age ( hei hi sim card a rawn chhuah tantirh laia a lova luak chhuaka kan buaipui, Vanglaini chanchinbu advertisement luah tam ber pawl a ni, hanmdang te hian an ti ve lovang, mahse tunah chuan an peih tawh lo)., ‘CHANGE’ tih tawngkam lar em em age te a thleng mek zel a. Chumi belhchhah turin emo culture leharirang culture a indo mek a, tu tak chak ang maw? Rilru leh ngaihtuahna puitlin hmaa hmanrua chi tinreng a thang chak em em Zawlkhawpui kechheh ruala ke chheh chak ve deuh, ka pianna khua ni bawk si chu lo awm ve niin,,,.

                    Khawpui nun bengchheng tak mai ata hahchawlhna awm tak maw tiin ka pianna khua-ah chuan ka letleh a. Thlifim thaw heuh heuh leh tlangram thiang mawi tak tak te chuan hahdamna hriatsenloh min pe a. Mahse, nuam ka lo tih ve em em thin chu a nuam famkim lo tlat. Famkimlohna khawvel mah nise chhungril ah a theihtawpin ngheh a tum lo tlat. Khawvel changkanna milin bike leh khawl ropui tak tak a lei a, mahse,‘Isua zara ka ta’ tia malsawmna petu faklam chhungrilah a awm lo va. ‘Inkhawm a hun ta e’ titu Biakin dar riin mipui mimir inkhawm turin a kaitho thei tawh lo.

                    “ In God we Trust” tiin America pawisa thirah chuan Pathiana innghat ram an nihzia tilangin an chhuang em em thin. Mahse, kum 2007 February thla-a an pawisa chher tharah chuan chu thumal ropui pali chu chhiar tur a awm ve ta lo… Ka pianna khua pawh chu changkan namen lovin a la changkang zel ang….Mahse, hlutna tihluzualtu, hausakna ti hausa zualtu, Pathian a theihnghilh chuan a pawi hle ang.

                     He kan zirna hmun Nehu Campus-a far thing hnuaiah pawh hian kan thil hlut zawng a danglam chho zel a, kum 20 kalta a zirlai te kha zawt rawh, hetiang hmasawnna hi a thleng lo… malsawmna tam takin min vur, a vurtu Pathianin. Vaivut ata vaivut-a kan letleh hma, Kasauti age te, Chiahpuam  leh Chiahthep-te, Varsity Week- te,improvement pek leh pekloh chungchang te, ‘chumi chuan chumi chu chaw eiah a sawm’ tihtein hun chu lo inher lo inher mahse, malsawmna petu chu “ Kei Alpha leh Omega, a Hmasaber leh a Hnuhnungber, a Bul leh a Tawp ka ni”  titu Pathian tho a ni, a la ni zel dawn. Mahse nangzawng, malsawmna hi bungrua-ah chauh teh lo la, computer hmet thei turte, mobile phone a message type thei turte hian ‘tunge’  chakna pe che tih hi chhut la, infiah fo bawk ang che. The Easter Brother-te chuan Pathian malsawmna hlutzia hriain tihian an lo auchhuak tawh asin,,,

                                              Cause there’s a roof up above me,

                                              And I’ve a good place to sleep

                                              There’s food on my table, and shoes on my feet

                                              You gave me your love, Lord and a fine family

                                              Thank you Lord for your blessings on me.

                     Titanic-in Southampton a chhuahsan dawn khan Pi Albert Calwell-i chuan lawng a a luh pahin khualchhawn hnenah “ In lawng hi a pil thei lo tak tak ang maw?” tiin a zawt a. Khualchhawn chuan “Ka Pi, Pathian meuh pawhin a tipil thei lovang” tiin a lo chhang a. A dik tak chuan Titanic kha an ngaihdanah chuan lawnglian a ni satliah lova, mihring thiltihtheihna ropuizia entirnaah an ngai deuh ber zawk.‘Ropui!Zahawm! Mak! Pil thei lo!’ tih a ni. Mahse, chu pil thei lo chu feet 12,000-a thukah a pil tlat a nih kha. Chu pil thei lo chuan a pil rual khan enngemaw a pilpui tlat- ‘ Mihring thiltihtheihna hi innghahna tlak a nihlohzia thu hi.” 

                      Mihring nunphung hrilfiahna atan hei aia tha hi a awm thei tawh awm love, mihring finna tam tak avangin Isua Krista kan ngainepin kan chapo a, a thiltihtheihna a taka a lo lan hunah chuan Titanic chhiatna ang hi kan chungah a la rawn thleng ngei dawn a ni. Hamthatna leh malsawmna hmuna a petu chawimawi nachang hrelo chu Pathian vek chuan a la tlanpel leh thuai ang. Mahse nangzawng, session tharah hian malsawmna aiin malsawmtu duh la, ropuina aiin hmangaihtu i thlang ang u aw….. Lehkha zir thei tura chakna petu che leh he far thing hnuai lo hruai thlengtu che hi‘TUNGE?’. I fak ang u.  A thupui nen khian a inhmeh lo tiraw…keipawhin ka ti ve tho. A tihtawp dan pawh ka thiam tawh lo. Tihian a tawp a ni mai.

                                              Aw Lalpa, i malsawmna hlu,

                                              Kan engkim chungah a lang;

                                              I thu lo chuan kan nunna hlu,

                                              Kan neih zawng nen a ral ang.

(AMPGSU chanchinbu NEHU a ka thai kawi mai mai)