Eng maw thi dawn mawlh lo chu. Hmangaihna te, inlungrualna te, Nehu campus a Mizo te chu an thiamna te sang hle mahse ‘Mizo’ an nihna an theihnghilh lo ang a, Mizo angin Kyllang Boys Hostel-a famkim lo taka kan zawm thin “ Thih leh ruam khatah, dam leh tlang khatah” tih khan chhawm nung zel ang chu le… Chuan a hnam angin kan boralin kan thi miah lo ang chu.
Hostel chan loh kan hlau
Khatia zirna sang zawk bel tura kan ngaihtuahna, kan ke leh thahrui kan hmanlai khan kan chhungrilah kan khur ru a, kan tiril a tim thin. Department hrang hrangah kan inziak lut a, hlawhtlinna tihfamkim a la ni tlat lo. Beisei nei tak, beisei ngam chiah loin hostel admission kan dil a nih kha. Tute nge an ni tih pawh kan hriat loh leh eng ang chhungkua atanga lo seilian nge an ni tih pawh ka hriatloh te nen khan hostel seat kan han inchuh tlang a nih kha. A then chu seat hmu tur chiang saa ti tha te, a then chu ti tha ve tho si, ti tha vak lo te; a then chu pass ve chang chang te kan ni a. Chuan le, hun a ki kal a, vanneih a siamin kan han hmu ve hlauh a nih kha. A then chu, ti ila a tam zawk a ni mah awm e, single room ni lovin triple room-ah seat pek ve kan ni hlauh mai a. Remruata pui roh khu, a vannei khawp mai. Admission list ah khan a tawp berah a awm a, single room a chang hlauh mai, a chalah khuan ‘VANNEI’ tih bela a kalna hmun apianga kalpui tlak a nih khu mawle.
Kyllang ah kan awm
Khatia seat pek ve kan nih atang khan Bah-Stanley a khan kan tan room min lo hauhsak hlauh mai, a lawmawm ngei mai. Ani pui hi AMPGSU-tan a inpek naah hian a active kan ti a, chhuanawm kan ti takmeuh ani. A average a lakin a mu lai pawh hi tlan inpeih reng ang a ni. Ani zarah buai lovin kan insawn lut ta a, room nuam tak maiah kan han awm ve ta a nia leh. Kan han insingsa fel a, Zirbawihtea, Solo-a (Pastor Fapa) Stanley, Muana (Kraua) te nen kan han awm ho ta a nih kha. Nula tan chuan Solo-a hi atchilh tham a nih hi le..amah avangin chaw vawi tam tak kan ei a, a rawngbawl sa diamin kan han ei a, kan puar thei khawp mai. HEY!! Solo, thank you for the music man… kan tingai lo a, tunah hian kan ti e.
Kan ho
Hmanah chuan High School kan kal tawh, khatih lai khan M.A val te chu ngaisang thei tak kan ni, mahse chu dinhmun chu kan hniakin kan han rap ve a, engmah vak a lo ni lo. Chhurbura tihdan te kan zir a, kan nunhlui te kan inphawrh chhuahsak a, kan innuihzat tawn fo thin. Kan ho a, kan hlim bawk thin.
Mi pakhat a hming Maka ni lo zawk…
Chutia hun leh ni kan chhiar liam ve mawp mawp lai chuan pa tawi te,bial mep mup, nelawm loh hmel taka lang, nelawm em em si a lo awm ve alawm le…. Kan hostel hnuai ber kha warden in mikhual thlenna atan dah vek tur a rawn ti ta tlat mai. Chumi avang chuan kawmthlangpa ho, Thinlaihnema te, Remruata (a hmelchhe zawk a ti Thenhlum pain) leh Marama te chu raltlan ang maiin an rawn tlanchho a nih kha. Pa te reuh te kan sawi tak,kamis ban bul ha fo thin pawh kha…Valzotea te Runmawi ang tluk zeta kan ngaih U Zira te roomah khan ‘Khawngaih takin ka lo invawmlut ve mai teh ang’ a ti anih kha. A room neitu te tan han phal loh chi ziazang a ni lo hrim hrim. A rawn invawm lut ta ngei mai. Hla te hi an hre hlui tiap tiap khawp a. Mi rinawm tak hnen atanga thu kan dawn danin ani khawpa Suangpuilawn High School zirtirtu nih chak hi van hnuaiah hian an awm leh tawh lo ang an ti. A piangthar tawh.. hmaaaaaaaaaaaaaaanah tawtawrawt a ham thin.
Chhiarkawp atchilhtu
Khawchhak Vaphai tlangval, a hming ah chuan Mawitea, a ni pui hi Chhiarkawp a chawk reng mai. Mahse, a chet zero naah chuan hero to zero a ni ringawt mai. Vawikhat pawh Japfu-a kan la awmlai khan alawm, gym-ah a lo kal a, mu chunga ritchawi chi kha a lo chawi ve niawm tak a ni, a lo mutthilhsan chu niin… Lungleng tak maia KTP guitar kuah chunga Lalsangzuali Sailo hla an sa raih raih mai thin kha chu (h), Buaina Ralliana hi a ni ringawt, ani hi Mizo Idol a a tel ngam phawt chuan ka tel ngam hrim hrim.
Pangpar Huan
Foundation Day-ah Pangpar Huan kan chang alawm le, pui tak a ni ringawt pui tak. Amaherawhchu, kan hmuhsitna leh kan diriamna lam ni lovin mipui rilru khawngaihna kan kaihthawh
theih mialin kan ti anih kha… Zanah kan zir, tawngtaina nen kan hlan ve thlap anih kha… A tak tak hun a lo thleng. Stanley-a nen khan a a zual kan ni a, a tak kan ni ringawt. Kan han chang chho a, U Zira’n ‘Bawnghnute’ an ti mai kha chu (h) a turu lutuk ringawt. .. .. a script a tel miah lo angin a tap a, a nuihzatthlak kher asin. Vawikhat kha, a script a tel lo ka lo sawi palh alawm le, Marama’n ‘a script ah a tel lo’ a rawn ti liah liah mai, a nuihzatthlak duh kher asin. A hnung lampang ah Muana a lo inla pa laite, Thinlaihnema an tawng thei lote, Solo-a a lo awm mai mai lai te, khang te khan nunhlui min chansan ta si amaw… Stanley-a nena min nuih tut tut lai te, an rilru in ‘saw mite pahnih saw’ an tih lai te kha hmanlai an lo ni ta a maw.. Mianglo hmuha min hmuh takngial tep te kha a va hlimawm em aw… He far thing hnuai ni thin, mahse building sak hmanhmawh in a hual lo ni mai tur a kan chanchin theuh kan chhukir changin min tihlimtu a ni fo ngei ang…ni velo an lo awm anih leh an ngai ve lo a ni mai.
Solo-a Maltova leh Calsom hi…
Hemi te pahnih hi kan inkhak iah iah nachhan chu a va ni tehlul em… Marama leh kei kha chuan kan ren hlawl lo…Solomona hi alawm, a lei peih lutuk a.. Vawikhat pawh a chhuah laiin Marama nen kan lo inru a, fiante a chawhna tur atana kan hman kha, tlem a bangnawi a lo la awm a, tui nen inpawlhin belah a lo awm chu niin, a neitupain then tlawk tlawk chungin a paih asin…hringnun tawlai chu ui takin a paih…ui tak a ni ringawt.
Marama rilru a na
Marama pui roh alawm..Chawlhni zinga kan chawhmeh hi ropui a ti lo ve thei khawp mai. Aizawlah te chuan Chawlhni tukah vawksa, dulhmul khat phuar in kan ei thin a nia,…keini hostelah te ve chuan tlangval chaw heh rual khan engngemaw kan han kil bial ve taih zel a, thil tui deuh an kil aniang chu a….tih mai te pawh a awl thin, amaherawhchu kan thil kil chu kan han bihchiang a, engdang ni lo chuan zikhlum kan, vawkchaw ang thawthang a an lo ngaih kha a nia, pui lo thei rem rem tak a ni…. A siamtu U Zira chu a induh ve theih nak lai a….
Shillongah hian Nawhchizuar an awm em??
Chawlhni tuk khat chutia zikhlum kan eiho lai chuan alawm le,,,Mawite-a hi a lehkha zirna room atang hian a lo chho a, kan awmkhawm thep thawp lai hian a ngawi vung vung a, a rawn tawng chhuak phawng mai a, tihian a rawn ti alawm le, “ Shillong ah hian NAWHCHIZUAR an awm angem le?” rawn ti a male, kan va han nui nasa tehlul em. A rilru a thil khatliam lutuk mai kha a rawn phuhchhuak niawm a nia…eng ang rilruin nge a rawn sawi ang aw.. ‘NGAIHTUAH PEIHTE TAN’. Keichuan ka hre hrawl lo, ka hre lo takzet a ni e…
Bekang sa hijacker…
Phakar leh phakar thah cheng ho kha kan nia, a phakar thiam thiam pumpui kha a dingchang a ni ringawt mai, kan 1st Semester nih lai chuan. Tin, thingpui te kha tui kan ti lutuk, mahse kan in vak ngai lo hrim hrim. Mi pakhat thlarau a thawh thut loh chuan kan in zen zen lo. Chawhhmeh siam te hi han siam zawh a han ei chuan a tui kan ti a, hlim pawh kan hlim tlang thin. Mahse, a ei zotu a tan kha chuan chakawm fahran thin loh khawp mai. Engvang maw kan tih chuan a ei zo hnuhnung ber khan ziah loh dan hmanga a kanna bel emaw a chhumna bel emaw kha a sil a ngai tlat thin alawm.
Zankhat chu Sen-Supanadi-a khan bekang sa (nutrela) kha a ei chak deuh a. Phur tak mai khan Sensiar kong dawrah khan a va lei a, tui hmel em em maiin a tuk zinga ei turin a kang sar sar mai a. Zirzawhaia leh Solomon-a hi SAZU LIAN, chawhmeh eiruk chingah an chang thut alawm le..min tichak zo vek a, kan ei kan ei a, zing chawhmeh tur chu zanah kan lambun a, kan hijack a, kan kidnap bawk.. a siamtu lah chuan mum 4 vel chu a chang ve awm e. U Zira leh Solo-a saw alawm.
‘Thih leh ruam khatah, dam leh tlang khatah’
Kan hun hman zawh tak te kha kan thlir kir a, nangni zawng lungleng lo ang maiin in awm a, keizawng ka lung a len a, ka mitthlaah a cham fo thin. Hnema mit leh Utawk inmil lutuk te, Rempuia chak deuh deuha a kal lai C.Ngaihan an zir te kha a va ngaihawm thin tehlul em. 1st Semester kan nih lai khan Remruata of Zoo nen hian Sa kan ru thin. Kan han inpuang a nge, sa hi a lo tui a ni. Zing dar 1-velah kan pahnih hian kan kang ru ve karh karh thin, Remruata (Pre) leh Marama Fourth Semester-a pianthar der an tum ti leh ngam ta chiah lo engngemaw a ruka an thli dun kerh kerh te pawh kan ang khawp mai.
Remruata of President-in Colgate/ Close Up hi ha nawhna ni lovin ei tur a ni tia AMPGSU member te min fuih a tum niawm taka duhthawh taka an ei tawn tawn lai te, Stanley-an thingpui tih thupui hmanga essay nalh lutuk an ziak te, Lalsenan Zakaia tet lutuk avanga KTP leader an nichho te, kan thianpa pakhat, (a hming ka sawi lovang) U Ziran ‘Isua kha sabengtung chunga a chuan khan lei a rah phak ka ring chiah lo a’ a ti lai te khan hmanlai an chang dawn ta maw….. Remruata of President hian duhthu a sam alawm le, Laptop leh Camera ka hralh ang a, bike ka lei dawn tiin an sam vel a… mahse a hostelmate te chuan Shoe-brush leh inbualna sahbon lei ngei ngei zawk turin an ti…..Thlanga (Salman Khan) intisek lai department-a kan tar lai te, Zautean nalh tak maia “Jena once more, pork chow and tea” an ti laite kha kan hmu leh tawh awm si lo a. Vawikhat Kyllang hluia kan la awm laiin, Zautea of English Dept. hi……. kan roomah kan awm loh laiin a lo lut a, kan tape kha a lo play a..amahin hruiin a lo inpawt zak zak a ni awm e…khata tang chiah khan U Muanan a lam thiam zia a hria…. Hmingmawia, Ralleng uisa duh ho anga tukkhum sam pakhat chiah zuah, ngawireng a fel em em, NGAWIRENG PAWL lo awm tura President tur, Ngawireng Pawl adviser atana Rindika, tawng lama insum thei em em duhtu pawh hi Billy Graham, American Evangelist hi Bill Abraham-a ti hmasa tu ber a ni awm e…
Kan nun hmanral tawh leh kan hun kal tawhte chu an liam ta. Thil tam tak, mawl thlak tak tak te pawh kan lo ti tawh, kan chhuan lem loh te nen. He Campus in pawi fakna ramah hian a chang chuan chhuk tlanin hlimawm takin kan tlan a, kan rin lohna lam daihah te min hruai thin, nawmna te pawh min pe thin. A chang leh vanram tlafual kan chen hi a ni ringawt thin. mahse chu vanram tlafual chu mihringin emaw, thil dangin emaw a hnawt kiam fo thin. Chu chu nun a ni. Ka han thlir kir hian lunglen khawhar a kaitho a, kan hun hman liam te kha kohkir theih nise a ngaihawm em avangin kohkir ka chak thin a, mahse lehkha zir hi…….
‘ Aw ka ngai, nunhlui zamual liam hnu
Hmanlai an chang ta maw,
Dawn chang ni te hian, Ka ngai nunhlui liamhnu,
Kohkir theih chang si lo’
A chang leh kan hostel-a kan thuneitu ten duhdah tak leh tham lo tak ten min ti a, a chang leh kan bianga hlimna avanga mittui a tlakna vekah chuan lungngaihna vawrtawp avangin thiante hriat miah lovin mittui te a tla fo bawk thin. Chhehvela thil a inthlak rualin a paltlangtu mihring pawh kan danglam ve zel a. Tu kutin nge chaw min pe dawn tih pawh ngaihtuah lova kan hringnun zi nuaih nuaih karah hian kan hriat loh hlanin puitlin lam kan pan ve bek bek a… ni khatin ni khat dang a her chhuah pui a, kan zir hnem telh telh a, ngaihdan mahni a sahuai thing vawn tlut te pawh kan nei ve zel a, kan nei zel bawk ang. Kutdawh lova intodelh kan tumna khawvel ah hian mahni a ding thei ni a inhriat aia mi zawng zawng hi innghengtawn vek leh mihring te hi thinlung taka inmamawh tawn vek kan ni tih hi kan hriat hunah nun thudik chu kan hre chauh ang.
(NEHU-a kan hostel chu
An Old Soul stuffs 
Leave a comment