Khualbuka leng ve lo

Chanchintha Luka ziak Bung 2: chang 7 ‘Tin, a fa tirah mipa  a hring a, puanin a tuam a, khualbuka an len ve tak loh avangin ran chaw pekna thlengah a muttir a.

Khuhhawnna

            Tunlai ang bawkin hmanlaiin chhiarpui a awm tawh thin. Tunlaia mahni awmna apianga hming kan ziak ang ni lo hian hmanlai chuan thlahtute khuaah kher an kal thin. Josefa pawh Davida thlah a nih avangin, Mari nen Galili Rama Nazareth khua atangin Davida khua Bethlehem-ah he hun pawimawh tak hmang tur hian an kal a ni.

Thuthlung Thar Khualbuk

            Thuthlung Thar lamah chuan khualbuk kan tih ang chi sawi nan hian thumal pathum   hman a ni a. Kan innghahna Pathian thua kan hmuhah hian kataluma tih hman a ni. Thuthlung Hlui hunah pawh he khualbuk ni awm tak hi a lo awm tawh a. Jeremia 41:17 kan chhiar chuan Kerea fapa Johanana leh a thuihhruaite chu Bethlehem khaw bula Geruth Chimham-ah (a hming Geruth Chimham tih pawh hi II Sam 19:37,38-a kan hmuh Chimhama hming chawia phuah a ni ang e an ti bawk) an chawl tih kan hmu a, hei hi Bethlehema khualbuk chu a ni ang a ti ten thenkhat chuan an sawi a ni.

. Heng khualbukte tunlaia hotel leh restaurant changkang tak tak ang hi ni lovin “zan lam atana chawlhna” a ni deuh ber mai a, ei leh in pawh mahnia inngaihtuah chawp a ngai a ni. Chumi avang chuan Khualbuk ropui tak amah ngo ngo hian a ni hran lo a, Tin, heng zin mite hi sanghawngsei te, leh ran dang dang hmanga zin kual thin an nih avangin heng khualbuk bulah te hian ran dahna in a awm deuh zel thin a ni awm e.

Tichuan Mari leh Josefa chu chhiarpui hun hmang tur chuan Bethlehem lam chu an pan ve ta. Khualbukah kan thleng ang a, hahdam taka chawlin nau kan hring ang tia an suangtuahna zawng zawng chu thawk leh khatah vawmbo ang duakin a awm ta.

            Lei leh Van Lal ber chuan ‘Khual bukah awmna tur a nei ve ta lo, khualzin ten an zinna atana an hman thin ran te chaw pekna thleng chu a chan tawk a ni ta mai. Kan thupui kha ‘Khualbuka leng lo’ tih a ni a, chumi chuan khualbuka leng lo chu Isua a nih rualin a nu leh pa pawh an ni tel bawk a ni. Chumi avang chuan thil pahnih ken tel a nei nghal a. Hetiang hian kawng hnih hian in sawi teh ang.  

Natna

A hmasa berah chuan he thil thleng hian Mari leh Josefa natna a thlen a ni. Mari raipuar teuh chungin zinkawng an zawh a, Bible pawhin rai teuh tawh tiin a sawi a. Nazareth atanga Bethlehem chu a hnai ber zawng pawhin mel 80 vel zet a ni si a. hmeichhia thla kua lai nau pai tawh motor pawh awm lo, ran chunga chuanga Nazaret atanga Bethlehem Km 111 vel an han kal tauh tauh hi han ngaihtuah chian chuan an va lainatawm tehlul em! Hetih hunlai hian Nazareth atanga Jerusalem khaw inkar kawng kal nan hian ni 5 atang ni 6 an hmang thin nia sawi a ni. Suamhmang leh ramsa hlauhawm tak tak karah Mari leh Josefa chuan zinkawng an zawh a nih chu, an va riang tak!  A nau pai avangin an zinkawng a nawm loh dawn tehlul nen. An thleng a, khualbuk an chang lo chhunzawm nghal chu a ni mai si a. Chang ve lo nih te, tling zo lo nih te, beisei ang thlen phak loh te hian mihring piankenah natna a thlen tel. Josefa leh Mari hi eng ang taka na nge an ni tih thuah hian Bible hi a ngawi a, nimahsela an pheikhawk bun ang bunpui chuan a hreawm tur zia hriatthiam chu thil harsa lo tak a ni ngei ang.   Tunlaia kan politician te intih hmuh thlam ropui kha Bethlehemah khan lo nei ve hlauh sela hetiang em em hian an vakvai bik lo tur. Hmelhriat lo nei tha hlauh phei sela chuan chuan khatiang em em khan an baihvai bik lo tur. Mahse, khawvel thlir chuan chant ha reng reng an kutah a awm lo a ni.

Lawmtu leh Dawngsawngtu nei lo Isua

 A dawt lehah chuan Khualbuk chang ve lo Isua hian lawmtu leh dawngsawngtu a nei lo. Isua te kha an rethei em em bik a ni hauh lo mai thei, nimahsela a pian dan erawh a rethei hle. Judate hi khawvela nau piang lawm thiam ber hnam an ni hial awm e. Nau pian dawnin vengte leh laichin hnaite bakah, nau lawm tura an rawih zaithiam rual, an tingtang leh phaiphuleng te, dar leh khuang te kengin an pung khawm thin. Nau a pian veleh ‘Mi enge?” an ti vat a ‘Hmeichhia’ an tih phawt chuan thawm nei hauh lovin, an dar leh khuangte, an tingtang leh phaiphuleng ten en an relhru bo zo vek a, a awm chhunin nau hming an sa nghal mai thin.

Mipa a nih erawh chuan, an inbuatsaih ang ngeiin an dar leh khuangte, ri thei zawng zawng nen, nau piang lawmin an au dur dur thin a, ralkhat atang pawhin mipa a piang tih a hhrait theih thin a ni. Tichuan, mipa chu hming an sa nghal mai lo va, ni riat a tlinin,  a serh tan pahin urhsun takin hming an sa thin. Chutiang anga nau piang lawmna tur an nei lo va, nau lawm thawm an awm hauh lo. An dinhmunin a zir lo a, an vengte leh laichinte an bul hnaiah an awm hek lo, chu zan zet zawng an tan lawmna zan ni mah se an khua a har vawng vawng hle a ni. Khualbuka mutna lum tha thaa mutna a chang lo piah lamah an hunlaia mipa faten an chan thin a chang ve lo hi a lainatawm hle a ni.

Thuchah

Isua changtu Mari leh Josefa

Mari leh Josefa khan an natna karah khan anni chu Isua an chang tlat. Hreawmin awm mahse a tawpah chuan mi vannei ber an ni. Anni chuan Isua an chang tlat. Khualbuk chang lo Mari leh Josefa chuan an tana Lal thar lo piang tur chu an thlir tlat a, hreawmah pawh nise chu chuan a nawr kal tauh tauh a, an harsatna chu in bawhbeh tir loin an sual chhuak a, a tawpah Isua chu an lo pawm thei ta a, Isua changtu an lo ni ta. Nau piang changtu kan nih a va pawimawh tehlul em. I khawvel zinkawngah harsatna leh manganna ten thla an zar thin a, khawhar vawng vawng chang pawh I nei thin. Engatinge kei kher tia Van Pathian I auh vawng vawng chang a awm thin? Chung zawng zawng lak ata chhanchhuak tur chein Isua hi a lo piang a, Isua changtu nge hnawltu I nih dawn. Chutiang chang thei tur chuan inbuatsaih rawh le.

Mahni chibai Inbuk.

Heng hreawm an tuar hi keini mahnia intlan thei tawh lo te tan a ni. Chutih a hnekin Krismas a lo thlen dawn apiang hian ‘Lal Thar Chibai Buk’ aiin Mahni leh Mahni ‘Chibai Inbuk’ kan uar a, mahni chibai inbuka mahni indah liana mahni hlimna um kan uar hle thin.

Ropui inti te tan ropui lo takin Isua chu a lo piang a, ropui tak chuan ropui taka chibai buk aiin kan thinlung a duh a, a ropui lohna hmun atang ngei hian ropui inti thinten kan ropui lohna, mahni in chhandam thei lo kan nihna chu hmuchhuak turin kan ropuina chu phah hniam a duh thin. He nau rethei leh khawhar hian I thinlungah hmun chan a duh a, chu chu a ni a lo kalna chhan pawh.

Kan Lal Isua vahvaih nan Judai ram kha tawk tawh sela, kumin Krismas lo thleng turah hian Lal Isua tan thinlung a lamah I hawn ang u hmiang.Lal thar chibai buk tura dal tu te zawng zawng tisa leh taksa lam thua siam tu zawng zawng te chu kalsan ngam ve rawh le. Krista tel ve na tlak lo Krismas, Krista chawimawi tumna tel lo Krismas hmang turin kan duhsak lo a che.Unau duhtakte u, he Krismasah hian Mahni leh mahni chibai I Inbuk dawn nge, Isua Krista Lal thar chu chibai I buk ve dawn.