Thinlung a thlir zawk thin

Khual buka an len ve tak loh avangin ran chaw pekna thlengah a muttir a Luka 2 :7

Hmanah Cornwall khaw te tak te ah

            Cornwall khaw te tak te chuan chu ni ropui lo thlen hun chu an nghakhlel kher mai. Urlawk zanah kumtina an tihdan angin naupangte pawhin Krismas lemchan an entir dawn a, naupang zawng zawng tel turin an inbuatsaih.  Harold-a chu naupang dangte ang lo takin a che muang em em a, a tawng a la ban zui. Lemchan buaipuitu chuan Harold-a a thlir chuan an lemchan ti hmuhnawm loh rawih theihtu a ni tih a hria, a tui hlawl lo! Chumi anih avang chuan an in ruahhmannaah chuan Harold-a chu vawi khat chauh a rawn lang ang a, tlar khat lek thu a sawi ang, “Pawi ka ti hle mai! Pindan ruak ka nei tawh lo,” tih te chu.
            A hun a lo thleng ta. Mari leh Josefa chu an rawn chhuak dun a, mipuite chuan ngawi thapin hmuhnawm chu an thlir a ni. Bethlehem-ah chuan riahna an zawng a, an vak an vak a. A tawpah chuan riahbuk pakhat an thleng ta. Kawngkhar zawn an thlen chuan Josefa chuan kawngka chu an kik karh karh a. Harold-a chuan a rawn hawng a. “Pindan ruak, thlenna tur i nei em?” Thawm chu a reh hle a, Harold-a lah chu a tawng ta mai lo! A tawp a tawpah harsa ti tak hian “Pawi ka ti khawp mai, pindan ruak ka nei tawh lo,” ti pahin kawngkhar chu a khar ri bur a. A buaipuitu chu a thaw huai mai. Josefa beidawng hmel chu ang tak a ni a, A nupui Mari chu a kai a, muangchang hian an kal dun a, dawhsan an chhuahsan dawn tih chuan buaina a rawn chhuak!

            Kawngkhar a rawn inhawng sawk a,“Josef ngawi lawk teh! La kal teh suh. Mari kha rawn hruai la, ka pindanah in cheng mai dawn nia,” tiin Harold chu a rawn au vak mai a. Mipui mak ti chu an hawi an hawi a. Chutih lai chuan i pakhat, Cornwall khua tana mi hnawksak leh mi te tithlabar reng reng thin Thomas-a chu a rawn ding chhuak a, dawhsan lam chu panin Harold-a chu han kuah a, a tap ta hawm hawm mai a. “Lalpa! enteh ka thinlung pindan-ah hian hmun ruak i chang ngai lo. Ka hriattheih ata i tan pindan zuah nachang ka hre lo va, midangte thlen turah ka lo dah thin che a, min ngaidam ang che” a ti a.  Kut beng thawm chu ring tak a ni. Harold-a erawh a hawihai hle thung.

            Hah taka kumtluana eizawnna kawng zawhte, Politic khel fuh inti te, mi dang zawng zawng Ram leh a kal mekna a an beidawn tawh laia la beidawn ve duh lo party worker te,  enge ka silhin ka fen ang tia buai em em thin (fashion maniac te), kum tluana lehkha zir reng renga hun hmang thin te, fashion icon/model emaw inti a nalh inti hliah hliah te, lu tih hai chiai chiai na tur neih loh hlau fahrana hmanhlel te, ‘Lalpa nang nen ngei aw’ titu te ten, kan zavai maiin dam ten kan thleng ang e maw tia kan nghahhlelh krismas chu kan lo thleng ta. He hun ropui tak hi hmang turin kan hun neih zat a inang vek a, tunge ‘Krista’  tan ngei ‘hun’ leh ‘hmun’ a thinlunga lo buatsaih sak tur a chu le. 

Hmanah chuan

            Zawlneite hrilhlawk, an innghahna, hreawmna leh phurrit zawng zawng lak ata chhanchhuaktu tura an beisei, tihduhdahna leh harsatna an tawh apianga an rilrua rawn thar leh thin, tlumtea thlir taka an lo thlir chu an rin loh dan ang tak maiin Pathianin a fapa Messiah ngei chu, Sualbawia tangte chhanchhuak turin a rawn tir ta a. An beisei loh dan a nih ang ngeiin mi tam takin hmanah Krista chu Messia a ni tih an pawm thei lo a,tun thlengin an thinlungah hmun an la kian hleithei lo zel a nih hi.

            Khualbuka a leng ve lo hi ‘Thutak lungchhiatthlak tak’ leh Zawlnei lo hrilhlawk famkimna a nih rualin, kan thinlung kawngkhar a rawn nghawr nghing dat nawn leh thin.  Ngaihthahna leh ngaihtuah thlen peih lohnain Krista tan hmun a kian lo thin. Mari kha Lei leh Van Lalber paitu a ni tih Khualbuk Vengtu khan a lo hre lo hlauh a ni mahna. Lal Isua tan hmun a kian thei lo a.  Thil tam tak a ngaihtuah a, kil tin, tlang hrang hrang atangin inchhiar turin mi an lo pungkhawm, buaipui tur an tam em a  ni. Pindan tam tak lo buatsaih a ngai a, mi tam tak ei tur buatsaih reng a ngai a, mikhual lo lawm a ngai bawk a,  raipuar tan thil tha a tihsak thei lo a, hun leh hmun a nei lo. Krista tan khan hmun leh hun a awm lo a ni.

Tunah Zawhna a thar leh thin

            Krismas kan hman dan pawh a changkang sawtin khawthlang lama an lawm dan TV-a kan hmuh chu kan hmu ve zel a, khawvel hi thingtlang hmun lianpui (global village) a lo nih tak avangin thenkhatte chuan kan ban pha mek bawk. Engemaw lai phei kha chuan a laipuia Krista dah Krismas (Christ-Centred Chrismas) ni loin a laipuia Kawnchei dah Krismas (Street-Centred Chrismas) a ni ngawt alawm le. Naupang, thalai, nu leh pa, veng kil tin atangin Kawn chei en kha kan intihhmuh a, thuneitu ten lawmman an siam avangin kawn chei kan ngaihlu a, kan en khan a Krismas ngawih ngawih a, a nuam a, a ropui tel bawk. Mipui AW thenkhatah phei chuan kawn cheina fanna tur Bus Service te hi a tul aniang-a te an ti thaw thang mai. A tam zawkah chuan a phawvuakah kan buai a, chu chuan kan ringtu nun a vaw nghet dawn emaw kan ti a, a lo ni vak thin lo.

            Enge ka ei ang a, enge ka in ang, eng hi nge ka lei ang, kawn cheimawi kan en dawn em? Urlawk zan/Kumthlui thlah zan chu engtin nge ni ang, ‘Karoake ah kan kal ang e, ei tur tui tak tam tawk nen kan hmang zawk dawn? Ngaihtuahna a buai zo a, hman nasat kan tum luatah kan tum anga hmang lo ni a kan hriatin, ‘Kumin Krismas chu a zo leh ta, a ho riau’ kan ti leh mai thin. Zawhna thar leh thin chu ‘Nausen lo piang hi i tan Tunge?’

Thutak nge phurna

            Consumerist culture atangin miin Krismas hi a thlir a, Lal lo pianga ngei tan hmun kian loin,  a mit chakna tih tlai a tum a, a lei chakna tifamkim turin a insengso thin. A phurna chuan a nawr, a va phur tehlul em! A phurna erawh chuan Krista hnen a hruai thleng lo thin mai pawh a.  Pathianin rilru phur theihna keimahniah a siam ngei e, chu chuan min tihlim thei a, min tilungngai thei bawk a. Mahse, phur lutukna chuan rilru fim min hmantir theih loh avangin mi tam tak he hunah hian an kalsual phah fo thin a ni. Isua’n chhangper 5 leh Sangha 2-a a hraipuarte chuan chhangper leh sangha thlahlelin Isua chu eng emaw chen an zui ve a. Mahse, Isua’n thutak “Nunna Chhang” thu a han hrilh chuan, “Hei hi thu khirh tak a ni, tunge hrethiam thei ang?” tiin an thinlung chu zawhna in a khat chhunzawm mai. (Johana 6:60). Krismas-a phur lo turin leh hlim taka hmang lo turin hlimna pe thei thil hi sawi nep a tul hauh lo, nimahsela heng piahah hian thutak a awm a, chu ngei chu ‘Nausen Krista’ a ni.

            Mitdel Bartimaia chanchin kha in lo chhiar em? A va lawm dawn em! A kianga Krismas lo thleng mek ah mitvar tam tak ten hmuh an tum loh, a tana hmun an ken loh ‘Isua’ kha hmuh a tum tlat a, a duhna leh chakna te chu Chunglamin ‘A tlawm vang leh rualbanlo’ anih avangin a hnawl sak hek lo. “Isu, Davida fapa min khawngaih rawh,” tiin khapbeh an tum pawhin a au mai. Pu Thandangate’n, “Aw Lal Isu, tunah hian ka thinlung fan ve la; chutin ka fakna hla ve chuan rimtui a chhuah ve nan,” an lo ti vawng vawng ang khan, Isua hian kan thinlungah hmun lo chang thar leh sela.

            Krismas lawm tur hian thil tam tak kan mamawh lo a. Roadside party leh Karoake-in hlimna tluantling a pe lo a, zanlai thleng thlenga midang tana bengchheng tura Lalroutmawi, Siampuii Sailo emaw Boney M ring tak taka zai tirah a awm hran lo a, KFC nena inchhawp khan a ti ropui sawt chuang hek lo a, Pathianin kan thinlung a zawng a, Cornwall khuaa mi dangte tana hnawksak siam thin tu in a thinlung a kian ang hian Krista chuan I thinlung leh ka thinlung a thlir mek e. Missionary Jackie Pullinger-i’n, “Kristian zawng zawngte hian Krista nena intawhna fel tak kan nei theuh tur a ni a; mahni ngeiin kan tawk ve lo a nih chuan kan hrethiam tak tak ngai lo ang,” a lo tih ang deuhin, Lal Isua pawh hi kan thinlunga a pian loh miau chuan enge a nih chiah hi a hriatthiam theih tak tak loh (Mat. 11:27). I thinlungah hmun a chang em?